ඔබය..ඔබමය..

මහා නියං කලකට හසුව

දැවෙන්නට ගිය ආත්මය

සනහා සතපා සිහිල් දියපොදකින්

ප්‍රාණවත් කල වැහි බිඳුව ඔබය..

සිනාවක් මතක නැතිව

ඉරිතලා ගිය මේ මුහුන මත

පාට පාටින් සෙනේ මල් ගෙන

අතුරා පතුරා විසිතුරු කල

ප්‍රේමනීය උයන් තෙර ඔබය....

ගම් නියම්ගම් පාලුකරමින්

ඉතිරි පැතිරුනු මහ වරුසා මෙන්

දෝරෙ ගිය කඳුලු බිඳු

ගලන විට හරවා කරවා වැව් තාවුලු

සත් කන්නයක් අස් වැද්දූ

මහා නිරිඳුන් ඔබය..

අඳුරේ තනිවී ඈත තරුවකට

අහිමි බව බව දැන දැනත් ලොබ බඳින විට

නොතැවී ඒ එලියෙන් දකින්නට ජීවිතය

තුන් තිස් පැයේ දැල්වූ කරවූ

දොලොස්මහේ පහන් සිළ ඔබය..

දියවී යන්නට මත්තෙන්

අවසන් කඳුලු බිඳුවත් නිහඬව

දෝත පා ලංකර මා මුව

පරිස්සමට හිනස්සූ මේ වත කමළ මත

ගල්වා නහවා සෙනෙහසේ ඔසු පැන්

සුවපත් කල ජීවක ඔබය..

සංසාරේ ආත්ම ගානකට

පැතුම් පොදි කැඳවා පුරවා

දැවටෙමින් සනහමින්

මා ලඟ රැඳෙන රැකදෙන

සදාදරණීය මගේ හිමිසඳ

සත්තයි

*

*

ඔබය..ඔබමය..

සත්තයි ආදරෙයි මහ හුඟක්..

එක දවසක් අහම්බෙන් වගේ ..

ඔය හිතුවක්කාර ඇස් ඉස්සරහ

මගේ හිත ගිහින් නතරවෙද්දි

නිකමටවත් හිතුනෙ නැහැ

ජීවිතේ සන්තකේම මට ඔයා වෙයි කියල..

ඒත් දවසක දෙපාරක් නොහිතම

කාලයක් තිස්සෙ එකතු කරපු

මහ හුඟක් බලපොරොත්තු අරන් ගිහින්

ඔයි පපුව උඩ අතෑරල

සැහැල්ලුවෙන් මම බලන් උන්නා..

මගේ රත්තරන් මට පතිනිවර අරන්

මා ලඟට එනකල්

ඒ වගේම ඔයා ඇවිත්

මේ පුංචි කෙල්ලගෙ අපිලිවෙල ආදරේට

ලස්සන පිලිවෙලක් ගෙනත් දුන්නා

එදා ඉඳල මගේ රත්තරන්ගෙ වෙලා

හිත පුරා පිලිවලට

ආදරේ කරද්දි තුන් හිතම නිස්කලන්කයි..

ඇත්තමයි සුදු මහත්තයො ;

දැන් ඉතිං මගේ හද ගැස්මත් ඔයා

මම තරම් සතුටින් ඉන්න කෙල්ලක්

මේ ලෝකෙ කොහේවත් නෑ..

ඔයාට  ගොඩා..රියක්  පින්

මම පතපු ආදරේ 

මම නොහිතපු තරම් වැඩියෙන් මට දුන්නට..

මම ඔයාට ගොඩාක් ආදරෙයි..

මේන් මෙච්චරක් කියල කියාගන්න බැරි තරම් මහ හුඟක් ආදරෙයි..

ආදරෙයි ආදරෙයි ආදරේම ආදරෙයි..!!!

සුභ නව වසරක් වේවා..

ලබන්නා වූ සිංහල හින්දු අලුත් අවුරුද්ද ඔබ සැමට බත බුලතින් සරු කිරියෙන් පැණියෙන් ඉතිරෙන අසිරිමත් සුභම සුභ  නව වසරක් වේවා..!!!

නුඹ හින්දා මං..

මහ හුඟක් සිතුවිලි

ඔය ආලවන්ත ඇස් ලඟ

දියවෙලා යද්දි

ඔබ ඇවිත් මේ හිතේ තැනක

කඳවුරු බැදගන්න ඇති..

එදා පටන්

රෑ අඳුරට ගැස්සෙන හිත

මල් පොහොට්ටු මෝරන හිමිදිරියෙ

හීතලෙන් ගල් ගැහෙනකල්

නුඹ ගැනම හිත හිත

නිදි වරන්නත් ඇති..

ඒ කාලෙදි

කිඳුරු කතාවෙ නැතිවූ කිඳුරව

හඬමින් සොයන කිඳුරිය වගේ

වරින් වර හිමි අහිමි වුනු

ඔබව මම

සොයන්නත් ඇති..

දැනටත්

සිරවෙවී පොඩි වෙවී හරි

අනේ නුඹ හින්ද

කඳුලු බිව්ව ඇස්

මේ ආත්මෙ ඔබ ලඟම

සැනසෙන්නත් ඇති..

හෙට හිරු පායෙන්නෙ ඔබේ රැස් එලියෙන්..

හදවතේ හරි මැද

ඔය ආදරය සලකුණු කරගෙන

මග බලන් හිටියා මම

බොහෝ කල්

ඔබ එනතුරු

යලි මා සොයාගෙන..

දිගැටි නෙතු අයිනක

කැටි වී දිලිසුනු කඳුලු බිංදුව

වැටී කම්මුල් දිගේ රූරාගෙන

බදා ගත්තා

ඔබ හාදු දුන්

මේ රෝස කම්මුල..

සිරකොට සුරතින් අල්ලාගෙන

ආ ජීවිත මගක කෙලවර

පාලු වී තනිකම දැනෙන විට

හිත දිව ගියා යලි යලිත්

නතර වන්නට

කඳුලු ඉවුරක..

මට හිමි නොවී වරින් වර

මගෙන් ඈතට උදුරගෙන යන

සැනසීම සොයා

නිතරම

ලත වුනා මම

දෛවයට දොස් පවරගෙන..

***

හඬ හඬා තැවෙමින් හරි

සොයාගත් ඒ ආදරේ අතැතිව

මග බලන් හිටි දවස අරගෙන

එනවලු ඔයා අද හෙටම

මගේ ඇස් දෙක ලඟට

හෙට හිරු පායෙන්නෙ එතකොට

ඔබේ රැස් එලියෙන් මගේ මිදුලට

ඉතිං රත්තරං කොච්චර වැලපුනත් මම

තව පැය කීයද වියලෙන්නට

මේ ඔක්කොම කඳුලු කැට

***

ළා සඳ එලියේ...

නා මල් පෙති මත ලා නිල් පාට සඳ එලිය තැවරිලා..මල් පෙති වල සුවඳ සඳ එලිය දිගේ ඔයත් මමත් තනිවුන මේ පුංචි කුටිය වටේ පාවෙනවා.. කවුලුව දිගේ අනවසරයෙන්ම ඇතුලු වුනු නිල් සඳ එලියට ඔයාගෙ වටකුරු ඇස් දෙක දිලිසෙනවා.. හරියට ඒ සුන්දර සඳ එලිය නාමල් සුවඳ  එක්ක එක්කහුවෙලා අපි දෙන්නට ඔච්චම් කරනව වගේ..

දිග හුස්මක් අරන් මම උත්සහ කලේ ආයෙත් ඒ සුවඳ ආත්මයටම විඳගන්න..ඒත් ඒ නාමල් සුවද වෙලා මට දැනුනෙ ඔයාගෙ සුවඳ..මගේ සිරුරෙ ගෑවි නොගෑවි අකීකරු ඇස් අගින්මා දිහා බලන් උන්නූ ඔයාගෙ ආත්මීය සුවඳ..ලා එළියෙන්  ඔයාට නොපෙනුනත් ඔයාගෙ ඇස් දෙකේ තිබුන කාන්සියට මගේ මුළු මුහුනම රතු වෙන්න ඇති..

මම මොහොතක් ඔය ඇස් දිහා බලන් උන්නා..මට දැනෙන්නෙ පුදුමාකාර සංතෝසයක්..ආත්ම ගානක බැඳීමක් නැවතත් රන් හුයකින් බැඳිලා මේ ආත්මෙත් මගේම වෙලා කියල මට දැනුනා..මගේ හද දෙවොලෙ මෙච්චර කල් හිස් වෙලා තිබුනු පූජාසනයට සුබ මොහොතින් වැඩිය දේවතාව ඔයා වෙලා...අද ඉදන්.. මේ මොහොතේ ඉදන් ..හමුවන හැම මොහොතකම ගෙවන හැම තත්පරයකම මගේ හිත ලඟ ඉන්නෙ ඔයා..මට ආදරේ කරන්න මාව රැක බලා ගන්න මට මේ ජීවිතේ කියල දෙන්න හරියටම කිව්වොත් මගේ සැප දුක බෙදාගන්න ඉන්න මගේ අම්මයි අප්පච්චියි ඔයා..මට ඇස් දෙක පියාගෙන වුනත් මගේ ජීවිතේ හැම බලාපොරොත්තුවක්ම පැතුමක්ම ඔයාගෙ දෙපාමුල ගෙනත් තියන්න තරම් විශ්වාසවන්ත රත්තරං හිතක් දැන් මගේම වෙලා..

ඉතිං දැන් දැන් මේ රාත්‍රියට ඔයාටයි මටයි පමනක් ඉඩ දීල තරු එළි පවා සැඟවිලා ගිහින්..නා පෙති සිප ගත්තු නිල් සඳ මඩලත් මල් යහනෙ සැතපෙන්න සූදානම් වෙලා. ඉඳිකටු තුඩක් වැටුනත් ඇසෙන නෑසෙන තරමටම මුලු පරිසරයම සුව නින්දට ගිහිල්ලා..මුලු වටපිටාවම ඒ තරම් නිසංසල වෙලා තිබුනත් වෙන කවරදාටත් වඩා මගේ හිත හොඳටම නොසන්සුන් වෙලා.. මෙතුවක් කල් දඟ පාපු පුංචි කෙල්ල අද ඔබේ පතිනිය වෙලා ඔබේ හිත අද්දර ජීවිතේ අයදිනවා.... ඉතිං මේ සීතල සුමුදු රාත්‍රිය සීරුවට විඳගන්න හිතාගෙන ජීවිතේ ප්‍රථම වතාවට ඔයාගෙ දෙපා මත හිස රඳවගෙන මම දෑස් පියාගත්තා.. හ්ම්ම්  හිතට දැනුනෙ නිමක් නැති සැනසීමක්..

ළා සඳ එලියේ...

නා පෙති හැලිලා...

නාමල් සුවඳයි විහිදෙන්නේ...

මා දිවි රැය සුවඳින් මල් පුබුදා...

සඳ දිය ඉල්ලයි හිමි සඳුනේ...

මවත් ඔබයි මගේ පියත් ඔබයි මගේ

පිළිසරණත් ඔබමය වන්නේ...

අද සිට මගෙ ඉටු දෙවියන් ඔබවේ...

ඔබගෙනි සැප දුක විමසන්නේ...

ළා සඳ එලියේ...

නා පෙති සිඹලා තරු එළි නිවලා

සඳවත සැතපෙයි මල් යහනේ..

ඔබේ දෙපා මත හිස රඳවන්නම්

පළමු වතාවට හිමි සඳුනේ..

 

ගායනය: නිරංජලා සරෝජිනි

 

මම..

පද වැලක් සොයමි මම

නොලියවූ කවියකට

එලි වැටක් නැති වුනත්

තේරුමක් වී ගැයෙන

..

සිතුවමක් අඳිමි මම

නිම නොවූ සිතුවමට

වර්නයක් නැති වුනත්

නිමාවක් වී පේන

..

ගීතයක් ගයමි මම

තනුවකට පද බැඳන

තාලයක් නැති වුනත්

පාලුවක් නොම  ගේන

..

ආලයක් සොයමි මම

හිතට හිත යා කරන

තනිකමක් නැති වුනත්

හිතට සැනසුම ගේන

..

සිහිනයක් දකිමි මම

සිතේ සිර කරන් සිටි

සොම්නසක් නැති වුනත්

දොම්නසක් නොම ගේන
..

කාලයක් සොයමි මම

පතා ඔබ වෙත එන්න

ලඟදීම නැති වුනත්

කවදාක හෝ මේම

..

සැනසුමක් සොයමි මම

මෙතෙක් මා නොලත් විඳි

කවදාක හෝ ලැබෙන

අදත් නොලැබෙයි සිතෙන

....

ඔබ රැඳුනා මගෙ සොඳුරු සිහිනයේ..

හරිම හැඩට ඔයා අදත් මගේ නෙත් මානයේ පිපිලා..ඒත් ඔය හිනීයට හිනාවෙන ඇස් දෙක දැක්කම මගේ හිත මහ හුඟාක් කලබල වෙලා ..

අනේ.. කොයි තරම් නම් මම ඔයාට ආදරේ කරනවද..මේ බලන්න මගේ හිත.. හතර වටේටම ලස්සනට මල් පිපිලා.. පුංචි පුංචි සමන්නලු, සීතල සුළං, සුදු පාට පිනි බිංදු වගේම අකීකරු මල් සුවඳත් වෑයම් කරන්නෙ ඔයා මගේ ලඟ ඉන්න මේ සොඳුරු මොහොත තව තවත් සුන්දර කරන්න...මේ බලන්න මගේ හිත පුරා  පිපුනු ලස්සනම මලි කිනිති මම නෙලාගෙන ආවෙ ඔයාට.. එක පාරක් මේ සුවඳ බලන්න..මේ මල් වල හමන්නෙ මගේ හිතේ සුවඳ..ඔයා තාමත් නොදන්න නොවින්ඳ මගේ හිත පුරා පිපුනු ආදරේ සුවඳ..

දන්නවද හැමදාම මම දෙනෙත් පියාගෙන එකම එක හීනයක් දකිනවා..ඒ හීනය පුරා හරිම බරට අඩි තියමින් පපුව පුරා ඔයා සැරිසරනවා.. ඉතිං මම හෙලන හැම හුස්මක් හුස්මක්  ගානෙම මම හිතේ සංයමයෙන්....ඒ පපුව පුරා සක්මන් කරන ඔයා වෙනුවෙන්.. මේ සිහිනය පුරා පාට තවරල කැටයම් ඇන්ද ඔයා කොහොමද මම මගේ පපුවෙ තිගැස්මෙන් නවත්තන්නෙ.. බැහැ මට කොහොමටවත් බැහැ..

ඔයා දන්නවද මෙච්චර කල් මගේ හිත කලුවර වැටුනු  අහසක් වගේ තිබුනෙ.. එකම තරුවක්වත් නැති මගේ මේ හිත් අහස පුරාවටම අද හරිම හැඩට දිලෙන තාරුකාවක් වගේ ඔයා තමයි පායලා ආවෙ.. දැනෙනවා.. හෙමීට මගේ දෙසවන් ලඟ ඔයා මොන මොනවදෝ මුමුනවා.. ඒ මොනාද මට හාන්කවිසියක් නැහැ..ඒත් මුමුනන වදන් වලින් හිත තිගැස්සෙනවා.. පුදුමයි මට හරිම අපූරුවට ඔයාව දැනෙන්න පටන් අරන්..ඔයාගෙ දිග අත් මගේ බඳ වටා හෙමීට එතිලා..ඔය දිගටි ඇඟිලි තුඩු මගේ හිස පුරා එහෙ මෙහෙ දුවවනවා.. මගේ මුව උඩින් පාත් වෙලා ඉන්න ඔයාගේ ඔය සුවඳ මට හොඳට දැනෙනවා.. ඔව් අද ඔයා මගේ ලඟ..මගේ ජීවිතේ ලඟ.. 

මට පුදුමාකාර සතුටක් දැනෙනවා..මගේ ජීවිතේ ලස්සනම හීනයක හැමතැනම ඔයා පිපිලා.. හිත සැලෙනවා..වේගයෙන් මගේ හද ගැස්ම වැඩි වෙනවා..අනේ මට ලෝබයි මේ මොහෙතෙන් මිදෙන්න..සත්තයි මේ සොඳුරු සිහිනයෙන් කවමදාවත් මට මිදෙන්න බැරි වෙයි.. දැන් මගේ ජීවිතේ මම පතන සොඳුරුම සිහිනය ඔයා වෙලා.. ඔයා මගේ මේ සිහිනයේ හැමදාම පායලා ආවත් නාවත් මගේ හිත රැවටෙන මේ සිහිනෙට ඉතිං මම දැන් ආදරේම ආදරෙයි..

ඔබ පිපුනා මගෙ නෙත් රිදෙන මානයේ..

ඔබ සැලුනා මගෙ සුසුම් වැල් ගානෙ..

ඔබ දිලුනා මේ තරු වැරූ අහසේ..

ඔබ රැඳුනා මගෙ සොඳුරු සිහිනයේ..

http://www.youtube.com/watch?v=zLbzgoT8HWk 

ප/ලි:මේ තමයි කසුන් කල්හාර ගෙ ඔබ පිපුනා ගීතය මගේ හිතට දැනෙන හැටි..මම ආසම කරන ලස්සනම ගීතයක්..  :)

ඔබට කැපවූ සෙනෙහස

ජීවිතේ බොහෝ දුර ඇවිද

මම ඔබේ ආදරේ සොයා ගෙන

පන නළ පවා තබා උකසට

ඇයැදුවා ඔබේ ආදරය දෙවියන් ලඟ

උවැසියක් මෙන් දිනෙන් දින

පේ වුවා අදහමින් මම ඔබව

භාවනාවක් වගේ දිවා රැය

කමටහන් පිරුවා

ඔබ මගේ ආත්මය කොට

පපුව මතම තබාගෙන ඔබ

ඉහිලුවේ අහස උසට දුක් ගින්දර

ඔබ ලඟ පාත නැති දාට

ඇවිලුනා තුන් හිතම හරි රස්නෙට

හදවතේ ආදරේ පුරෝගෙන

ගනන් මිමි සෙව්වා හැම රැයක

නැති වුනොත් දවසක ඉතිං ඔබ මට

පියාගමි නෙත් දෙක

මේ සීතල පොළොව යට..

සමු දුන් පෙම්වතිය..

එකෝමත් එක දවසක

ඔයාගෙ නිල් පාට ඇස් දෙක

කාටත් හොරා මට රහසක් කිව්වා

ඒ රහස පරිස්සමට හිත කොනක තියාගෙන

නොදන්න ගානට

මම ඔයාට ගොඩාරියක් රිදෙව්ව

ඒ ආදරේ නැති කමට නෙමෙයි

ආදරේ වැඩිකමට

ඔය හිනාවෙන ඇස් දිහා

කාටත් හොරෙන් මම

පැය ගනන් බලන් හිටියා

හිතට දැනුනෙ පුදුමාකාර ලෝබකමක්

මම දස දහස් වර හිතුවා

අනේ ..

ඔයා මගේ වෙනවනම් කියල

ආත්ම ගානක බැඳීමක් 

එදා ඔය ඇස් වල ලියවිලා තිබුන

ඔව් මම කියෙව්ව

ඔය ඇස් දෙකේ ලියල තිබුන හැම දෙයක්ම

හරිම පරිස්සමට මම කියෙව්වා

ඔයා වගේම මමත් දැනන් උන්න

අපේ හිත් අයිති අපිටමයි කියල

සත්තයිමේ හිරිමල් හිත

නැලවුනේ ඔයාගෙ ඔය තරු ඇස් දෙක ලඟ

දාල යන්න බැරි තරමට

මම මටම ආදරේ කරන්න ගත්තෙ

ඔය ඇස් දෙකෙන් කඩා වැටෙන ඒ ආදරේ නිසා

ඒත් රත්තරං මම දැනන් උන්න

මට මේ ලෝකෙට අයිතිවාසිකම් කියන්න

දැන් කාලයක් නැති තරම් වග

කොහොමද මම කියන්නෙ

ඔයා මට ආදරේ කරන්න ගත්තු දවසෙ ඉඳල

ඔයා මට ආදරේ කරපු තරමටම

ඊටත් වැඩියෙන්

මරණය මම ලුහුබඳින වග

මගේ හිත ගොඩාරියක් අසරණයි

මටවත් මම හිමි නැතිව

කොහොමද මම ඔයාට හිමිවෙන්නෙ

මටවත් නැති මගේ  ජීවිතේ

කොහොමද මම ඔයාට දෙන්නෙ

රෑ දිවා නැතිව මම ලතැවුනා

ඒකයි මේ හිතුවක්කරකම..

මම තවත් ගොඩාරියක් රිදවලා

ඔයාට නොකියම ගොඩාක් දුර ගියා

කැමැත්තෙන් නොවුනත්

අකමැත්තෙන් වුනත් යන්න වුනා

ඒත්..

අදටත් රෑට අහස කොනක

පුන්චි තරු කැටයක් වෙලා

මම ඔය ඇස් දෙක කියවන්නෙ

ඔයා පිච්චෙන ගින්දර මට තාමත් දැනෙන නිසා

අනේ මට පුලුවන් වුනානම්

එකම එක පාරක් ඔයා ලඟට ඇවිත්

කියාගන්න බැරි වුන ආදරේ කියන්න

ඔය පපුව බදාගෙන අඬන්න..

වෙනද වගේ ඔයාට හොරෙන් 

ඔය ඇස් දෙක කියවන්න..

කොච්චර මම වාසනාවන්තද?

ප/ලි:මේක ලියන්න විශේශ හේතුවක් නම් නැහැ.. පින්තූරය නිසා ලියන්න හිතුනෙ..

හීන දැකපු හිත..

එක දවසක් හැන්දෑවක

සඳුත් එක්ක එකතු වෙලා

හරි හරියට එළිය දෙන්න

හීන දැක්කා..

ඒත් ඒ හැන්දෑව කවදාවත් ආවෙ නෑ..

හීන දැකපු මගේම හිත කළුවර වුනා..

තව දවසක් හිමිදිරියක

හිරුත් එක්ක හරි හරියට

මලින් මලට පාට දෙන්න

හීන දැක්කා..

ඒත් ඒ හිමිදිරිය කවදාවත් අවෙ නෑ..

හිතේ තිබුන හැම පාටම දියවෙලා ගියා..

තව දවසක මද්දහනක

වලාකුලක සැඟවීගෙන

හරි හරියට සිසිල දෙන්න

හීන දැක්ක..

ඒත් ඒ දහවල කවදාවත් හමු වුනේ නෑ..

හීන දැකපු මගේ හිතම  පිච්චිල ගියා..

හැම දිනකම ඔයත් එක්ක

හරි හරියට හිනා වෙලා 

 ආදර හිත ඔයා ලඟඳි දිග හරින්න

හීන දැක්ක..

ඒත් ඔයා තාමත් නෑ..

හීන දැකපු මගේ හිතම පාලු වෙලා..

ප/ලි: බ්ලොග් එකට එන්නෙ නෑ කියලා යන්න හැදුවට යන්න හිතෙන්නෙ නෑ..දැන් දින චර්යාවෙ කොටසක් වෙලා බ්ලොග් ලියන එකයි බ්ලොග් කියවන එකයි..මගේ යාලුවො හැමෝටම ස්තූතියි...කමෙන්ට් නොකලට සුපුරුදු ලෙසම හැමෝගෙම ලිපි කියවල ඇති..ආයෙත් මම ලියනව..මගේ බ්ලොග් එක..ඔයාල ගොඩක් දෙනා කිව්ව වගේ පාලුවක් දුකක් දැනුන හැම මොහොතකටම ඇත්තටම අපේම පරන ලිපියක් හරි අපේ යාලුවෙකුගෙ බ්ලොග් එකක් හරි කියවද්දි ටිකකට හරි හැම දේම අමතක වෙනවා..හිතට සහනයක් දැනෙනව..  :-))

නුඹත් මමත්

හිතේ කොතනක පිපුනිදෝ නුඹ

මම නොදන්නා ඉසව්වේ..

ඇවිත් ඉඳ හිට හිත පුරාවෙම

සුවඳ දැනුනා සීරුවේ..

නමක් නැති ලෙන්ගතුකමක් ගෙන

මියුරු හැඟුමන් පිබිදුවේ..

අකීකරු හීනෙකින් දුටු නුඹ

මගේ පෙම් හිත හැඩ කලේ..

නුහුරු පාටක් සොයන්නට මා

රෑ දිවා කල් වෙහෙසුවේ..

පාට තැවරූ සුවඳ මල් ගෙන

නුඹ මගේ හිත සැරසුවේ..

මා හදේ ඇඳි පුරුදු සිතුවම

නුඹමදැයි සිත විමසුවේ..

වෙන කෙනෙක් නොව නුඹමයි ඒ

යලි යලිත් සිත පැවසුවේ..

හීන පොදි බැඳි මගේ මුලු හිත

ඉතින් නුඹගෙයි මතු දිනේ..

එකින් එක ගෙන හෙමින් කියවා

තනා දෙනවද ජීවිතේ..

නිදි නැති රැය

මලානික සඳ එළිය විසිරුන

යහන මත රූ රටා මවමින

ප්‍රේම සිතුවිලි සෙමින් දිගහැර

සිත රිදෙන පවසින් විඩාවින

ලබැඳි සෙනෙහස් සිත දරාගෙන

නෙතු පියන් තද කොට පියාගෙන

රැහයි නාදෙට කන් යොමාගෙන

පැය ගනන් නිදි නැතුව ලතවින

නොලද සැනසුම තවත් දිගු විට

ඔබෙන් ඇයදූ නේක හැඟුමන

යහන පාමුල බිඳි විසිරී

එකින් එක කඳුලින් ගිලී යන

නේක සැප සම්පතක් නැතුවට

හිතට නුඹ ඇති තුටින් ඉන්නට

තනි වූ යහනෙ නුඹ පතා මට

නොදේ ඉවසුම් අඳුරු රැයකට

ඉරි තැලී හිත තැලී පොඩි වී

හෙටත් අලුයම උදාවනවිට

කඳුලු පිසදා සිනාසෙන්නම්

ලබනු රිසියෙන් ඔබේ උනුහුම

සතුට ඉහිරී වැටෙන තුරු මට

සුසුම් උනුසුම අරන් පපුවට

තබා ඔය රුව මගේ හිත යට

විඳිමි මේ දුක ඉතිරි දෙමසට

මට ආසයි !

ඉස්තරම්ම ආදරයක්
ඔබ දෝතට අරන් ඇවිත්
ආසයි මට රැඳී ඉන්න
නෙතු අතරේ ටික මොහොතක්..

පරිස්සමට මම ඇවිදින්
තුරුලු කරන් ආදරයෙන්
මට ආසයි කියා දෙන්න
හිත නිවනා පෙම් කවියක්..

ලස්සන නිල් ඇස් දෙකකින්
සලනා මුදු හැඟුම් බැලුම්
නොතේරුනා වගේ ඉදන්
ආසයි රිදවන්න ටිකක්..

මල් පෙති ඇතිරූ මෙලෙකට
ඔය දෙතොලේ පහස සොයන්
මට ආසයි සිප ගන්නට
පරිස්සමට එක මොහොතක්..

විකසිත පෙම් පොකුරු අරන්
ආදරෙයෙ සුවඳ ඔබන්
මට ආසයි ඒ මල් වල
ලියන්න ආදරෙ තරමක්..

සෙනෙහසේ පොරොන්දුව !

හිත ආලකම් පාන කිරි කෝඩු ආදරේ

හද ගැහෙන තාලයට වැයෙන විට ජීවීතේ

රෑ දිවා මතුවෙනා මදහාස සිහිනයේ

ලියවේවි කවි සඳැස් මේ ප්‍රථම ප්‍රේමයේ..

දිනපොතේ පිටු පුරා සැමරේවි ආදරේ

සඳ තරුත් සුපතාවි හිනහෙන්න ජීවිතේ

කුමුදු මල් සුවඳකින් දැවටිලා මදනලේ

රැඳෙමි රැකගමි සදා මහමෙරක් ආදරේ..

ඔබේ උණුහුම දිගේ සොයාවිත් ජීවිතේ

තැනූයෙමි මේ භවෙත් නවාතැන ඔය හදේ

සදාකල් රැකගන්න පුද දුන්නු ආදරේ

ලියුවෙමී රුහිරයෙන් පොරොන්දුව සෙනෙහසේ..