Pages

Monday, February 27, 2012

නුඹත් මමත්



හිතේ කොතනක පිපුනිදෝ නුඹ
මම නොදන්නා ඉසව්වේ..
ඇවිත් ඉඳ හිට හිත පුරාවෙම
සුවඳ දැනුනා සීරුවේ..

නමක් නැති ලෙන්ගතුකමක් ගෙන
මියුරු හැඟුමන් පිබිදුවේ..
අකීකරු හීනෙකින් දුටු නුඹ
මගේ පෙම් හිත හැඩ කලේ..

නුහුරු පාටක් සොයන්නට මා
රෑ දිවා කල් වෙහෙසුවේ..
පාට තැවරූ සුවඳ මල් ගෙන
නුඹ මගේ හිත සැරසුවේ..

මා හදේ ඇඳි පුරුදු සිතුවම
නුඹමදැයි සිත විමසුවේ..
වෙන කෙනෙක් නොව නුඹමයි ඒ
යලි යලිත් සිත පැවසුවේ..

හීන පොදි බැඳි මගේ මුලු හිත
ඉතින් නුඹගෙයි මතු දිනේ..
එකින් එක ගෙන හෙමින් කියවා
තනා දෙනවද ජීවිතේ..